Skrifað af Viðari Þorsteinssyni 3. apríl 2007

Tæplega níu þúsund Íslendingar hafa nú gerst opinberir stuðningsmenn Sáttmála um framtíð Íslands sem ýtt var úr vör þann 18. mars síðastliðinn með stuðningi hóps þjóðþekktra Íslendinga. Fjöldi undirskrifta og skelegg ummæli þúsunda Íslendinga sem skoða má á vefsíðu sáttmálans eru órækt vitni um andstöðu meðal þjóðarinnar við óheft framhald stóriðju og virkjana.

Framtíðarlandið leggur áherslu á að vera þverpólitískt þrýstiafl sem hvetur ráðamenn til góðra verka, hvar í flokki sem þeir standa, enda eru umhverfissjónarmið í eðli sínu þverpólitísk. Leitað var sérstaklega eftir stuðningi þingmanna og frambjóðenda við Sáttmála um framtíð Íslands. Almenningi gafst færi á að senda staðlað bréf til þingmanna þar sem þeir voru hvattir til að undirrita Sáttmálann, og með undiriskrift sinni gat þingmaðurinn orðið „grænn“ en að öðrum kosti verið „grár“.

Afraksturinn af þessum þrýstingi er þegar mikill. Réttur þriðjungur þingheims, eða 21 af 63 þingmönnum, hefur undirritað sáttmálann. Skipting þeirra eftir þingflokkum er þannig:

Framsóknarflokkur: 1 af 11 þingmönnum er grænn

Frjálslyndi flokkurinn: allir 5 þingmenn eru gráir

Samfylkingin: 15 af 19 þingmönnum eru grænir

Sjálfstæðisflokkurinn: allir 23 þingmenn eru gráir

Vinstrihreyfingin - grænt framboð: allir 5 þingmenn eru grænir

Skoða má græna og gráa þingmenn hér .

Af úrtaki nýrra frambjóðenda til Alþingis sem Framtíðarlandið tók saman eru 18 grænir af 75, eða tæpur fjórðungur. Sjá má græna og gráa frambjóðendur hér .

Á opnum umræðufundi í Hafnarfjarðarleikhúsinu sl. miðvikudag var fulltrúum flokkanna gefinn kostur á að skýra afstöðu sína til Framtíðarsáttmálans, stóriðjuframkvæmda og umhverfismála almennt. Hjálmar Sveinsson útvarpsmaður stýrði umræðum, en fulltrúar flokkanna í pallboði voru þessir:

Ingibjörg Sólrún Gísladóttir, formaður Samfylkingarinnar

Illugi Gunnarsson, frambjóðandi Sjálfstæðisflokks til Alþingis

Kolbrún Halldórsdóttir, þingkona Vinstrihreyfingarinnar - Græns framboðs

Ómar Ragnarsson, formaður Íslandshreyfingarinnar

Guðjón Ólafur Jónsson, þingmaður Framsóknarflokksins

Kristinn H. Gunnarsson, þingmaður Frjálslynda flokksins

Söfnun opinberra stuðningsmanna við Sáttmálann um framtíð Íslands á vefnum og í gengum sms heldur áfram allt til kosninga.