Skrifað af Viðari Þorsteinssyni 16. apríl 2007

Háttvirtur fjármálaráðherra getur ekki reiknað út hagvöxt til 2017

Í tilefni ummæla Árna Mathiesen fjármálaráðherra, í fréttum Ríkisútvarpsins um „að stóriðjustopp sem stjórnarandstaðan hefur boðað myndi kippa fótunum undan þeirri útrás sem nú sé í undirbúningi í umhverfis- og orkugeiranum“ og „að hagvöxtur yrði um 1% minni á ári næstu 10 árin“ vill Framtíðarlandið koma eftirfarandi á framfæri:
Íslensk orkufyrirtæki hafa byggt upp mikla þekkingu á síðustu áratugum. Nú virðist því haldið fram að forsenda útrásar orkugeirans séu álver í Helguvík og álver á Húsavík og virkjanaframkvæmdir til að afla raforku til reksturs þeirra. Í þessu samhengi má benda á að stoðtækjafyrirtækið Össur þurfti ekki marga einfætlinga til að fara í útrás. Í raun var það skortur á heimamarkaði sem gerði það að verkum að fyrirtækið hugsaði stærra og víðar og hefur síðan haslað sér völl á alþjóðavettvangi. Hið sama gildir um banka, lyfjafyrirtæki, sjávarútvegsfyrirtæki og að sjálfsögðu orkufyrirtæki.

Framtíðarlandið bendir á að 39 lönd í heiminum geta tekið Orkuveitu Reykjavíkur og Hitaveitu Suðurnesja sér til fyrirmyndar. Um 600 milljónir manna búa á svæðum sem geta nýtt sér þessa þekkingu. Næstu ár ráða úrslitum um hvaða fyrirtæki verða leiðandi í þessari þróun og það er ljóst að þar eru ærin verkefni til að nýta og auka þá þekkingu sem hér hefur verið byggð upp með reksti hitaveitna og jarðgufuvirkjana. Landsvirkjun áætlar að hagnaður á 40 ára rekstri Kárahnjúkavirkjunar verði um 4 milljarðar. Með því að stuðla að fleiri slæmum samningum við alþjóðleg álfyrirtæki er verið að veikja íslenskan orkuiðnað og tækifæri til útrásar, en ekki styrkja hann.

Hagvöxt er ekki hægt að reikna út 10 ár fram í tímann. Fyrir 10 árum sá enginn fyrir vöxt í hugbúnaðargreinum, ferðaþjónustu, lyfjaframleiðslu, fjármálagreinum eða tengdum geirum. Menn sáu heldur ekki fyrir opnun heimsmarkaða og bætt samskipti með tilkomu nettenginga. Á næstu 10 árum munu breytingar ekki verða minni og þúsundir ungmenna sem nú mennta sig munu stuðla að hagvexti og framþróun á öllum sviðum samfélagsins. Framtíðarlandið treystir því að fjármálaráðherra hafi slíka trú á íslenskum mannauði, hugviti og atvinnulífi að hann sjái óttalaus fyrir sér vöxt og viðgang íslensks samfélags án þess að Ísland þurfi að verða stærsta álbræðsla í heimi.

Þá er rétt að minna á að samkvæmt tveimur nýlegum Gallup könnunum vilja 58% þjóðarinnar að hlé verði gert á frekari stóriðju næstu 5 árin og 61% þjóðarinnar vilja að ákvarðanir um frekari stóriðju verði settar í þjóðaratkvæðagreiðslu. Framtíðarlandið skorar á ráðamenn þjóðarinnar að sýna skoðunum Íslendinga virðingu. Loks er áréttað að Framtíðarlandið hefur lagt til í Sáttmálanum um Framtíð Íslands að “Við sýnum komandi kynslóðum virðingu með því að láta lögfesta áætlanir um náttúruvernd áður en nokkuð frekar er aðhafst í orkuvinnslu.”

Í Framtíðarlandinu eru á fjórða þúsund meðlimir af öllum sviðum þjóðlífsins. Framtíðarlandið vill stuðla að því að hugvit, frumkvæði og sköpunargleði fái að njóta sín til þess að byggja upp mannvænt samfélag og fjölbreytt atvinnulíf á Íslandi í sátt við náttúruna og þjóðir heimsins. Félagið starfar sem þverpólitísk hugmyndaveita og þrýstiafl og vill styðja stjórnvöld til góðra verka.

Frekari upplýsingar:

Rögnvaldur J. Sæmundsson, Forstöðumaður Rannsóknarmiðstöðvar HR í nýsköpunar- og frumkvöðlafræðum
Þetta tölvupóstfang er varið gegn ruslpóstsþjörkum, Þú verður að hafa JavaScript virkt til að sjá það. GSM 822 9491

Hrund Skarphéðinsdóttir, verkfræðingur
Þetta tölvupóstfang er varið gegn ruslpóstsþjörkum, Þú verður að hafa JavaScript virkt til að sjá það. GSM: 847 6448